Ardido Lesdi Najeriya Alh. Umar Musa Yar’Adua jabi dereeji accol golle de Ministaen Hukuma njamu lesdi ndii, Professor Adenika Grange e nanta Mr. Gabriel Aduku windi. Ministaen ben fuu jo’ini golle mabbe sanadu tumayeeje de Hukuma faddol mosle e bonanda jawle gomnati kawtal lesdi Najeeriya, EFCC tumirta be, be aybu majjinki ceede hewtande Naira milliyonji temedde tati (N300 Million) nder ceede hiiso hukumawa gan luttude majjinaka rawani yago nder sigorde ceede nde lesdi. Gomnati Ardido Yar’Adua umri kala hukuma gomnati lesdi Najeeriya lorna ceede  maaje luttade naftiraaka gam hawtadee nder hasree hiiso ceede  killanta lesdi dum hikka.

Gomnati Kawtal Lesdi Najeeriya wii, wurtini jabruude kese musamman de lartata fitinaaji nder tayre Niger Delta gam wadda kerol maaji.Sekereteejo mawdo mo gomnanti kawtal lesdi Najeeriya, Alh. Babagana Kingibe on andinika haa siire Abuja lamorde lesdi  Najeeriya, wakkati giidal besdol andal ngal balde didi dow ko larani rento barkaaji kubbirlee hakkude lesde lomoodu Guinea/ Gulf of Guinea.Gidal ngal sawri bote yerbuki sooje ngam doggina rento nder lomoodu dun, tiggo kawtal ngal tokkata yiiduki wakkati wakkati, hakkude gomnati kawtal lesdi, gomnati jihaaji e hukumaaji  pamari mussamman nder tayre Niger Delta, heba tayre nden fa’a yeso.